ပေကျင်း - တရုတ်နိုင်ငံတွင် ကိုရိုနာဗိုင်းရပ်စ်အသစ်တစ်မျိုးကြောင့် လူ ၂၆ ဦး သေဆုံးပြီး ၈၀၀ ကျော် ကူးစက်ခံထားရကြောင်း အစိုးရက သောကြာနေ့ (၂၄) ရက်တွင် ထုတ်ပြန်ခဲ့ပြီး ကမ္ဘာ့ကျန်းမာရေးအဖွဲ့ (WHO) က ယင်းရောဂါကို ကမ္ဘာလုံးဆိုင်ရာ ကျန်းမာရေးအရေးပေါ်အခြေအနေအဖြစ် ကြေညာရန် “စောလွန်းသေးသည်” ဟု ပြောကြားခဲ့သည်။.
ကြာသပတေးနေ့ညအထိ ကူးစက်ခံရသူ ၈၃၀ ဦးရှိပြီး သေဆုံးသူ ၂၆ ဦးရှိကြောင်း တရုတ်အမျိုးသားကျန်းမာရေးကော်မရှင်က ပြောကြားခဲ့သည်။ ကူးစက်ခံရသူအများစုမှာ ပြီးခဲ့သည့်နှစ်နှောင်းပိုင်းတွင် ဗိုင်းရပ်စ်စတင်ပေါ်ပေါက်ခဲ့သည်ဟု ယုံကြည်ရသော တရုတ်နိုင်ငံ ဝူဟန်မြို့တွင်ဖြစ်သည်။.
ယခုစနေနေ့တွင် စတင်မည့် တစ်ပတ်ကြာ တရုတ်နှစ်သစ်ကူး အားလပ်ရက်အတွင်း တရုတ်နိုင်ငံသား သန်းရာပေါင်းများစွာသည် ပြည်တွင်းပြည်ပ ခရီးသွားလာရန် မျှော်လင့်ထားသဖြင့် ကူးစက်မှုနှုန်း မြန်ဆန်လာမည်ကို ကျန်းမာရေးအာဏာပိုင်များက စိုးရိမ်နေကြသည်။.
ရောဂါဖြစ်ပွားမှုကို ထိန်းချုပ်ရန် ရုန်းကန်နေရသည့် ဟူဘေးပြည်နယ်ရှိ လူဦးရေ ၁၁ သန်းနေထိုင်သည့် ဝူဟန်ဒေသန္တရအစိုးရသည် ကြာသပတေးနေ့တွင် ပြည်ပလေယာဉ်ခရီးစဉ်များ အပါအဝင် သယ်ယူပို့ဆောင်ရေးအများစုကို ရပ်ဆိုင်းခဲ့ပြီး လူများကို အိမ်တွင်နေထိုင်ရန် ညွှန်ကြားခဲ့သည်။ နာရီပိုင်းအကြာတွင် လူဦးရေ ၇ သန်းခန့်ရှိသော အိမ်နီးချင်း Huanggang မြို့ကလည်း အလားတူအစီအမံများကို ကြေညာခဲ့သည်။.
အသက်ရှူလမ်းကြောင်းမှတစ်ဆင့် ကူးစက်နိုင်သော ဗိုင်းရပ်စ်အတွက် ကာကွယ်ဆေး မရှိပါ။ ရောဂါလက္ခဏာများတွင် ဖျားခြင်း၊ အသက်ရှူကြပ်ခြင်းနှင့် ချောင်းဆိုးခြင်းတို့ ပါဝင်ပြီး အခြားအဖြစ်များသော ရောဂါများစွာကဲ့သို့ပင် ဖြစ်သည်။.
ဓာတ်ပုံ- ရိုက်တာသတင်းဌာန
ဟောင်ကောင်မှာ ကိုရိုနာဗိုင်းရပ်စ်သစ် ကူးစက်ခံရတယ်လို့ သံသယရှိတဲ့ လူနာတစ်ဦး
